Izan ere, musika sinfonikoaren arloan, alemaniar musikari hau maila gailenenko orkestrekin batera aritzen da, horien artean New Yorkeko Orkestra Filarmonikoa, Chicago zein Bostoneko orkestra sinfonikoak, BBC-ko orkestra filarmonikoa eta Frantziako Orkestra Nazionala; eta ganbera-musikari dagokionez ere interprete garrantzitsuenekin aritzen da mundo osoko aretoetan: Anne-Sophie Mutter, André Previn, Renaud Capuçon eta Steven Isserlis, besteak beste.

Daniel Müller-Schottek (Münich, 1976), Pedro José Rodríguez donostiar pianojoleak lagundurik, Robert Schumannen Fantasiestücke, opus 73 eta Johannes Brahmsen Biolotxelo eta pianorako 2. sonata fa maiorrean, opus 99 interpretatuko ditu.

Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

Lehenbiziko aldia da Oreka TX orkestra sinfoniko batekin bakarlari aritzen dela. Egun Harkaitz Mtnez de San Vicente eta Mikel Ugartek osatua, Oreka TX taldea 1997an sortu zuten Harkaitz Martínez eta Igor Otxoak. Nömadak TX proiektuaren egileak, txalapartaren erabateko gaurkotasuna aldarrikatu ea mundu osoko eszenatokietara eraman duten musikarien belaunaldi berri baten kide dira.

Txalaparta, Euskadiko Orkestraren eta Oreka TXen bategitea ekarri duen musikalana. Iván Fedele (Lecce, 1953) italiarrak idatzitako partitura hau Euskadiko Orkestra Sinfonikoaren TESELA egitasmoaren baitan estreinatuko da. Tesela Euskadiko Orkestrak bere 30. urteurrena ospatzeko abian jarritako konposizio-proiektua da, BBVA Fundazioaren lankidetza esklusiboa duena. Nazioarte mailako ibilbide nabarmena duten zortzi konpositoreei nolabait euskal kulturarekin lotura duen obra banaren enkargua egin izana du oinarri. Zortzi obra, Euskadiko Orkestrak bere hiru hamarkadak ospatzeko eraikitako musika garaikidez eginiko mosaikoaren zortzi tesela izango dira. Aurrez, denboraldiko beste programatan Michael Finnissyren Zortziko, James Dillonen White Numbers eta Mario Lavistaren Tres cantos a Edurne aurkeztu dira. Estreinaldi-seriea 2012/2013 denboraldian osotuko da.

Kontzertu hauetako programa Daniel Müller-Schott (Münich, 1976) alemaniar biolontxelojotzailearen interpretazio bakarlariarekin irekiko da, Dvoráken Biolontxelo eta orkestrarako kontzertuan. Orkestrarekin estreinakoz 2010ean aritu zen interprete hau bere belaunaldiko talentu nabarmenetakotzat hartua izan da. New Yorkeko Orkestra Filarmonikoa, BBC-ko Filarmonikoa, London Philharmonic, Israelgo Sinfonikoa, Frantziako Orkestra Nazionala edo Berlingo Irratiko Sinfonikoarekin aritu da, Askhenazy, Eschenbach edo Masur bezalako maisuen zuzendaritzapean. Musika ikaslgelatan zabaltzeaz arduratuta, Rapsody in School erakundearen lankide da eta maiatzaren 23an Bilboko Deutsche Schulen izango da. Gainera, Daniel Müller Schott maiatzaren 19 larunbatean 11:00etan Euskadiko Orkestraren egoitzan izango den Miramongo Matinéean protagonista izango da. 

Musika biziki maite duen gazte talde batek sortutako abesbatza da KUP. 2003ko udaberrian hasi zen lanean, musikaz gozatu eta, aldi berean, ahalik eta kalitaterik handieneko musika eskaintzeko asmoarekin. Gabriel Baltés da taldearen zuzendaria: abesbatzen munduan punta-puntakoa eta Musikene Euskal Herriko Goi Mailako Ikasketen Zentroan abesbatzen zuzendaritza-irakaslea. Euskadi, Frantzia, Luxemburgo edo Eslovenian eskaini dituzte kontzertuak eta Tolosa, Maribor, Tours eta abarreko lehiaketatan esku hartu dute. Tours-eko Forilège Vocal Nazioarteko Lehiaketan garaile izanagatik joan zen azaroan Tolosan izandako Europako Abesbatzen Sari Nagusiko finalean aritu zen.

Musikaren historiaren bi mende baino gehiago hartuz, XVIII. etik XX.era, KUP Taldeak Miramongo Matinéetan aurkezten duen egitaraua bere askotarikotasunagatik bereizten da. Interpretatuko dituen obren artean, Haydnen lanak (lau ahots eta pianorako), Schuberten Ständchen gizonen abesbatzarako eta altoaren soloa sopranoak interpretatuko dueneko bertsioan, Brahmsen Lieder und Romanzen, opus 44etik hiru eta Fauré eta Castelnuovo-Tedescok Víctor Hugo eta García Lorcaren poemak oinarri harturik sortutako lanak.

Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik. 

"Musika irekia" da Euskadiko Orkestra Sinfonikoak Kontzertu Denboraldi berrian barrena abiatzeko aukeratutako leloa. "Musika irekia" lemak Orkestraren nortasunari erantzuten dio: kultur, hezkuntza eta gizarte mailan dituen betekizunei jarraiki, bere musika eremu, formatu eta publiko ezberdinei zabaltzen dien erakundea baita. Bere jarduera nagusi Abonu Denboraldia oinarri harturik, Euskadiko Orkestra eraldatu eta bere musika irekia beste fomatuetan eskaintzeko moldatzen da: Miramongo Matinéeak zikloaren Orkestra da, Musika Gelarena, jada ezaguna den KlasikAT zikloaren Orkestra, Musika Laborategiarena; baita bere kontzertuak sarean eskaintzen dituena; behar bereziak dituzten gizataldeen gizarteratzea ahalbidetzen saiatzen den Orkestra; euskal sorkuntza eta unibertsalaren ondarea gordetzeko berau grabatzen duena; sortzaile berriei lagundu eta bestelako arteekin sinergiak bultzatzen dituen Orkestra; munduan barrena bidaiatu eta musika bere eremuetatik kanpo zabaltzen duena.

Euskadiko Orkestra Sinfonikoa etengabean garatzen ari den espazio zabala da, dinamiko eta berriztatzailea, gertukoa, non proposamen bakoitza, publiko zehatz bati egokitzeko diseinatua, gozatua izateko prest dagoen, eskuragarri. Eta era berean bizikidetzarako ezinbesteko espazioa da, ideiak partekatu eta euskarri ezberdinetan, berariazko zein birtualetan aurkezten diren mezuen elkargunea. Helburua bere musika ahalik eta gehien gizarteratzea da, horretarako norbanakoaren interesei erantzunez. Musika da, beti musika irekia, non gure gizarteko kide bakoitzak bere tokia aurkituko duen. Izan ere, 30 urte dira jada, 3000 emanaldi baino gehiago, 3 milioi entzuletik gora.

Gernikako bonbardaketa, Euskadiko Orkestra Sinfonikoa eta Bilboko Koral Elkartea beste behin elkartuko dituen musika-motiboa. Izan ere, gertakari penagarri haren oroimenez sortutako partiturek behin baino gehiagotan elkartu dituzte bi erakunde hauek: 2000. urtean, Euskal Konpositoreen Bildumaren baitan Pablo Sorozabali eskainitako monografikoaren barnean Gernika euskal hileta martxa grabatu zuten. Eta 2008an, Francisco Escuderoren (1912-2012) Gernika opera argitaratu zuten, mundu mailan estreinako aldiz. Sorozabalek 1976an idatzitako abesbatza eta orkestrarako partitura 1966an txistu, tronpa eta danborretarako egindako estreinako martxaren berrikusketa da.

Joaquín Achúcarro Euskadiko Orkestra Sinfonikoaren Abonu-Denboraldian berriz ere. Beti ohore handia da Orkestrarentzat nazioarte mailako ospea duen Joaquín Achúcarro pianojotzailea bere eszenatokietan izatea. Oraingoan musikari bilbotar itzaltsuak bere jaioterrian, eta baita Iruñean ere, Paganiniren gai baten gaineko rapsodia interpretatuko du; musikalan hau "Rachmaninoven katalogo osoko obrarik sotilenetakoa da, asmamen handikoa eta arreta handienaz eraikia", egitarauari oharren egile Juan Manuel Vianaren hitzetan.

Berriz ere Municheko Orkestra filarmonikoa zuzendu ostean Euskadira itzuli den Andrés Orozco-Estradak zuzenduko duen programa hau osotzeko Richard Straussen Heriotza eta eraldatzea eta Till Eulenspiegelen bihurrikeria dibertigarriak izango dira entzungai. Lehenbizikoak xehetasunen zale den Strauss erakusten digu eta bigarrenari, berriz, komikotasuna, ironia eta izugarrikeria dario. 

Bi hitz etengabe errepikatzen dira larunbateko kontzertuan entzungai izango diren obretako testuetan: basoa (Wald) eta ehizaldia (Jagd). Hauei musika instrumentala sortuko duen tronpa gehitzen badiegu literatura, pintura eta zinemaren oroitzapenak ekarriko dizkigun topikora hurbilduko gara. Euskadiko Orkestrako tronpajotzaile Mario Telentiren hitzetan, "aintzinako musika, xumea eta traszendentzia laburrekoa, baina sakona, sentibera eta zuzena da; denboraz at geratzen den musika, iragana eta oraina islatzen dituena, xumea eta klasikoa Schubertekin, naif eta traszendentea Schumannekin, biziki erromantikoa Brahmsekin". Brahmsen Lau kantu, opus 17, Schumannen Bost kantu, opus 137 eta Schuberten Nachtgesang im Walde errepertorio unibertsaletik ateratako obra bikainak dira, Erromantizismoko ideia baliotsuena laburbiltzen duen "musikara egokitutako sentimendu" horretara hurbiltzen gaituztenak: Natura, alegiazko baso batean irudikatua, XIX. mende gatazkatsuan inspirazioaren ingurunea bilakatzen da.

Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

27 urterekin, Diego Matheuz, Gustavo Dudamelen urratsei jarraiki, venezuelar sistema ospetsuaren fruitua da. Haur zein gazte orkestra-sare nazional baten bidez, musika-talentu berrien harrobi garrantzitsua da sistema hau. José Antonio Abreuk duela 36 urte abian jarritako hezkuntza-egitura honen erakusle nagusi Gustavo Dudamelek Los Angeles eta Gotemburgeko Orkestra Sinfonikoen titular gisa bere ibilbidean aurrera doan moduan, Diego Matheuz Claudio Abbadoren eskutik heldu da Europara eta Veneziako La Fenice antzoki mitikoaren musika-zuzendaria da egun. Europar orkestra onenak zuzentzen dituen bitartean, Matheuz Europa, Txina eta Japonian barrena ari da lanean eta orain estreinako aldiz dator espainiar estatura Euskadiko Orkestra Sinfonikoa zuzentzera. Gaurtik aurrera Diego Matheuz Euskadiko Orkestra Sinfonikoaren buru arituko da programa osatuko dute bost kontzertuak prestatu eta zuzentzeko. Atriletan izango dira aipatu Mario Lavistaren Tres cantos a Edurne, Saint-Saënsen Biolontxelo eta orkestrareko 1. kontzertuaren biolarako moldaketa eta Rimsky-Korsakoven Sheherazaderen suite sinfonikoa.

Tres Cantos a Edurne, Tesela proiektuaren hirugarren estreinaldia. Kontzertuak Tesela proiektuaren baitan sortutako obra berri baten estreinaldiarekin irekiko dira. BBVA Fundazioaren lankidetza esklusiboa duen proiektu honekin Euskadiko Orkestraren 30. urteurrena ospatzen da konpositore nabarmenei egindako enkarguen bidez. Eduardo Lavista mexikarrak sortua, Tres cantos a Edurne obra erlijiosoa da. Bata bestearen atzetik etenik gabe doazen hiru atal labur ditu. Triptiko piktoriko baten antzera, kantu bakoitzak adierazpide berezia du, sentimendu propioa, baina aldi berean, kantu bakoitzak beste bien ezaugarri komunak ditu.

Händel Elena Sancho sopranoaren, Borja Rubiños klabe-jotzailearen eta Euskadiko Orkestra Sinofnikoko kide diren Irene Echeveste biolin-jotzailea eta Gabriel Mesado biolontxelo-jotzailearen eskutik dator Matinéetara.

Georg Friedrich Händel konpositorea barroko garaiko sortzaile nagusienetako bat dugu eta baita mendebaldeko musikan artista eraginkorrenetako bat ere. Bera dugu bere sorkuntza noblezia zein mezenasei eskaini beharrean entzulegoaren gustura egokitu eta zuzendu zuen lehenbiziko konpositore modernoa. Italian emandako lehenbiziko urteetatik Londresen pasatako azken egunetaraino ia bere ibilbide osoa hartzen duen bere ganbera-musika ekoizpen interesgarritik, Bederatzi aria alemaniar entzungo ditugu. Oratorio sendoengandik urrun, Händelen katalogo guztiko lan pertsonal zein ederrenetariko bat bilakatu ziren. Testuek, Barthold Heinrich Brockes-ek idatzitako poemek, naturaren edertasunaren eta honek gizakiekiko duen eraginaren inguruko irudi poetiko ugari biltzen dituzte. Horren emaitza dira aria malenkoniatsu, samur zein lirismo gozodunak. Egitaraua osotuz, 3. Sonata la maiorrean, opus 1, eta 13. Sonata re mariorrean, opus 1. Maisu-lan txikiak dira, bere oratorio erraldoiengatik ezaguna den konpositoreak ustekabean sortutako bitxiak.
Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik. 

Radovan Vlatkovic (Zagreb, 1962), Berlingo Irratiko Orkestra Sinfonikoko tronpa bakarlari izan zen eta postu hau bere ibilbidea bakarlari gisa jarraitzeko utzi zuen. Egun tronpa-jotzaile ospetsuenetakoa da eta jarduera pedagogikoari dagokionez irakasle da Salzburgeko Mozarteumean eta Madrilgo Sofia Erregina Goi Mailako Musika Ikastegian. Vlatkovicek 2009an egin zuen debuta Euskadiko Orkestraren Denboraldian, Krzysztof Pendereckiren zuzendaritzapean bakarlari aritu zela, eta orain Orkestraren Haize-Sekzioa zuzentzeko itzuli da gurera.

Kontzertu honetako egitaraua Mendelssohnen Nokturnoa haizeentzako, Dvoráken Serenata haizeentzako eta Mozarten Gran Partita obrek osatzen dute. Juan Manuel Viana, egitarauari oharren egile kritikariak hitz hauekin laburbildu du: "Haize instrumentuetarako Gran Partita izugarrizkoarekin, garaiko serenatek eta divertimentoek ezaugarri zuten izaera arina, adeitsua eta gorte girokoa gainditu zuen Mozartek. Berak utzitako ondarea 1824an jaso zuen Mendelssohn nerabeak haren obra ezezagunetako baten bitartez eta, mende erdi geroago, Dvorákek, bere sustrai eslovakiarrei tinko eutsi zien Serenata zoragarrian jaioterriko folklorearen arrastoa eta musika herrikoia jotzen zuten talde haien nortasun landatarra konbinatzean".

Kontzertua Bilboko Juan Crisóstomo de Arriaga Musika Kontserbatorioan. Bezperan, osteguna hilak 15ean, Orkestrako Haize-Sekzioak, kroaziar birtuosoaren zuzendaritzapean, egitarau hori bera interpretatuko du Bilboko Juan Crisóstomo de Arriaga Musika Kontserbatorioan, erakunde honen kontzertu-programazio interesgarriaren baitan.

Aurten Kepa Junkerarekin elkartuko dugu gure Orkestra.

Informazio zabalagoa duzu gure web orrian. Sarrerak 15,00 €ko prezio bakarrean daude salgai eta, ohi bezala, Gasteiz, Bilbo, Donostia eta Iruñean izango gara.

Kontzertu hauek komunikabideei aurkeztu zaizkie Orkestraren egoitzan egin den prentsaurrekoan. Bertan mintzatu dira Iñigo Alberdi, Orkestraren zuzendari nagusia, Kirmen Uribe, idazlea eta narratzailea, eta Lawrence Renes zuzendaria.

Musika eta literatura bat egiteak izaera propioa duen arte-lana sortuko du. Bere osotasunean bi diziplina artistikoen elkartzea gainditu eta haratago doan arte-lana, hori izango da "Mundu Berriaren binetak"; hemen mundo berria ez derizo amerikar kontinenteari soilik, literatura eta musika uztartzetik eszenatokian zuzenean sortuko denari ere bai.

Musikari dagokionez, egitarauak ere Kirmen Uriberen eleberrian islatzen den bidaiaren ideia, Euskadi eta Estatu Batuen arteko lotura jasotzen du, poetaren kontakizunean hitzen azpian gordetzen den soinu banda bilakatuz, nolabait esateko. Aukeratutako zatiak bezala, bere nortasunaren bila dabilen norbait irudikatzen duten ezin konta ahala ñabarduradun hotsak dira. Soinu banda hori Copland-en Fanfare for the Common Man, Aita Donostiaren Rapsodia Bascongadako Itsasoan, Bernstein-en Candideko oberturak, Barber-en Harientzako Adagioak eta Dvorák-en Mundu Berriaren Sinfoniak osatzen dute. Kirmen Uribek egindako teatralizazio txikiak eta landutako argiztapenak Atlantikoaren bi aldeen arteko zeharkaldiaren ideia indartuko dute halaber.

Orkestrak bere Denboraldiaren baitan Honneger-en David Erregea, Shostakovitch-en Babi Yar Sinfonia (Xabier Elorriaga narratzaile zela) edo Aragüesen Vita (Bernardo Atxagaren poemak Andoni Alemanek errezitatu zituelarik) programatu baditu ere, nobela baten zatiak oinarri harturik programa bat diseinatzen den eta Orkestrak testuen egilearen beraren lankidetza duen lehenbiziko aldia dugu honako hau. Kirmen Uribek literatura bestelako arteekin uztartzen dituzten hainbat ikuskizunetan hartu du parte. Horien artean, Bar Puerto, eszenatokian poesia, musika, bideoa eta ahozko historia biltzen zituena, eta Zaharregia, txikiegia agian CD-liburua, New Yorken eman zituen errezital batzuen ondorioz sortua.

Lawrence Renes holandarra izango da kontzertu hauen musika zuzendaria. Bigarren aldia da Renes EOSen Abonu-Denboraldian zuzendari gonbidatu aritzen dela, 2010eko martxoan debuta egin ondoren.

Ruth Gipps (1921-1999), laukoteari izen ematen dion sortzaile, zuzendari eta irakasle britainiarra, musikari emankorra izan zen, ganbera zein musika sinfonikoko partitura ugariren egile. Orkestrarako lanen artean, hainbat sinfonia eta kontzertu idatzi zituen, oboe eta orkestrarako kontzertu ezberdinak barne. Aipagarria da, halaber, irakaskuntzaren alorrean Trinity College of Music edo Royal College of Musica bezalako erakunde ospetsuetan egindako lana. Vaughan Williamsen ikasle nabarmena, izaera adoretsu zein interesgarria izan zuen Ruth Gipps-ek, are gehiago bizi izan zituen garaietan, gauzak ez baitziren errazak izan bere bizitza musikari eskaini ziion emankume honentzat. Julian Lloyd Webber biolontxelojotzailearen hitzetan, "bera bezalako jenderik gabe, ezin izango genuen errepertorioaren inguruan beharrezko genuen eskarmentua geureganatu. Bere gogo bizia kutsakorra gertatzen zen". Talentu aparta eta musika-ezagutza sakona izan arren, Ruth Gippsen lana ia ezezaguna da, baita bere jaioterrian ere.

Entzungai izango diren bi obrak instrumentu hau eta hari-hirukotearen hotsa lantzeko bi estilo eta modu oso ezberdin zein bereziak aurrez aurre jartzeko izan dira hautatuak. Bata, Jean Françaix konpositore frantziarrak idatzia da. Duela mende bat jaiotako konpositore ospetsu honen estiloa modernoagoa da eta garaiko frantziar musikaren eraginpean agertzen da. Bestea, berriz, Ruth Gipps-ek sortu zuen ikuspuntu erabat ezberdin batetik, aukera teknikoen ezagutza pertsonala oinarri harturik (izan ere oboe eta korno ingeles interpretatzaile profesional izan baitzen Birmingham Hiria Orkestran, besteak beste) eta baita musika ingeles tradizionalaren eraginpean.

Biolontxeloa instrumenturik aldaberatsuenetariko bat dugu. Erregistro oso zabala du, baxuen nota grabeenetatik hasi eta sopranoen nota altuenetara doana. Honexegatik biolontxelo talde batek musika-ensemble oso bat osa dezake du, abesbatza baten modura ia musika mota oro lantzeko gai delarik.

Gauzak honela, Euskadiko Orkestra Sinfonikoaren biolontxelo taldeak gidatutako bidaia bat prestatu dugu, dibertigarri zein liluragarria, lau mendetako askotariko musikatan barrena: errenazimenduko musika, musika barrokoa, klasikoa nahiz erromantikoa, jazza, ragtime, pop-a, tangoa, The Beatles taldearen musika edo "heavy metal" eta baita Lady Gaga-ren techno-house doinuak... guztia zortzi biolontxelorako moldatua.
Kontzertua goizeko 11etan hasiko da eta sarrerak www.kutxa.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera.

Gerd Albrecht-ek (Essen, 1935) estreinakoz zuzenduko du Euskadiko Orkestra eta berak estreinatutako obra bat dakar gurera: Alexander Zemlinskyren Cymbeline-ren suitea. 1914-15ean konposatua, estreinatu gabe geratu zen lehenengo mundu gerra hasi zenean eta Gerd Albrechtek suite moduan estreinatu zuen 1996, Hamburgeko Orkestra Filarmonikoa zuzenduz. Suiteak Zesarren garaian Bretainiako errege Cymbeline eta bere alaba Imogen biltzen dituen drama giroa azaltzen du. Honen barne, Lied des Cloten sopranorako kantu laburra dugu, oraingoan Petra Froesek interpretatuko duena. Bere ibilbide luzean, Kasselgo Operako, Berlingo Deutsche Oper eta Copehnaghen-eko Daniar Irratiko Orkestra Sinfonikoaren titular izan delarik, Gerd Albrechtek errepertorio aberatsa landu du: Zemlinsky bera bezalako erromantikoak, Fortner, Ligeti, Penderecki eta Schnittke bezalako berriagoak, XX. mende hasierako konpositoreak (Schoenberg, Berg, Webern edo Hindemith) landu ditu eta kontzentrazio eremuetako biktima izandako musikagile ahaztuen lanak ere berreskuratu ditu (Ullman, Klein, Haas,...). Era berean, Albrecht haur zein helduen musika hezkuntzaren arloan aritzen da. Haurrentzako hainbat liburu argitaratu du eta 1989an talentu gazteen garapena sustatzen duen "Gazteentzako Musika Fundazioa" sortu zuen eta "Hotsaren Museoa"ren sortzailea da halaber; bertan haurrek berrogeita hamarretik gora musika instrumentuekin esperimentatzeko aukera dute horretarako antolatutako tailerretan. Urtean 30.000 haur baino gehiago izaten dira Hamburg eta Berlingo egoitzetan. Egitaraua osotzeko, Orkestrak orain bere errepertoriora gehituko duen Erwin Schulhoffen 2. Sinfonia eta Beethovenen 3. Sinfonia, "Heroikoa" izango dira entzungai.

White Numbers, Minessotan bizi den James Dillon eskoziarrak sortua, Robert Rauschenberg-en (1925-2008), obra bat, The Lily White (lehen White Painting with Numbers) obra oinarri harturik egindako hausnarketaren emaitza da. Estatu Batuetako artista honen obra Guggenheim Bilbao Museoan izan da ikusgai. Dillonen katalogoan, 70etik gora obren artean, bereziki aipagarriak dira Nine Rivers, isuriaren eta turbulentziaren arteko harremanak aztertzen dituen bilduma, eta The Book of Elements ziklo pianistikoa. Dillonek BBC Proms, London Sinfonietta, Bruselako Elkarte Filarmonikoaren edo Pariseko Orkestra Nazionalaren enkarguak jaso ditu eta bere obraren atzera begirakoak egin dira Paris, Oslo, Toulouse, Brusela eta New Yorken.

Sarrera gisa, Albert Roussel (1869-1937) konpositore frantziarraren miniatura bat izango da entzungai. Ravel eta Debussyrekin batera, Roussel joan zen mendeko lehenbiziko erdiko frantziar musikagile nabarmenetako bat izan zen. Euskadiko Orkestrako kide diren Anne Charlotte Lacroix fagot-jotzaileak eta Victor Bogdanov kontrabaxujotzaileak interpretatuko duten Fagot eta kontrabaxurako duoaren ezaugarria bi instrumentu baxu konbinatzean datza; geroago beste hainbat konpositorek, Rousselek eraginda, egin zuen honen moduko konbinaketarik, horren adibide Sofia Gubaidulinaren Fagot eta biolontxelo orkestrarako kontzertua.

Ondoren Gavriil Popov (1904-1972) errusiarraren Septetoa do maiorrean, opus 2 interpretatuko du ganbera talde osoak, Antonio Lajara Angel-en zuzendaritzapean. Obra hau 70eko hamarkadan bigarren aldiz argitaratu zenean Ganbera Sinfonia gisa eman zen ezagutzera. Konposizio mota hau zuzendari baten gidaritzapean interpretatua izatea sarritan eman zen XX. mendeko konpositoreen artean: esaterako, Schönberg-en "Antzaldatutako gaua", kontrabaxu eta zuzendariarekin interpretatua izateko moldatuta argitaratu zen 1945ean; eta Stravinskyren "Soldadu baten istorioa" septetoa ere zuzendariarekin aurkeztu zen.

Kontzertua goizeko 11etan hasiko da eta sarrerak www.kutxa.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera.

Euskadiko Orkestrarekin debuta egiteko, Andrés Orozco-Estradak zuzenduko duen 6. Abonu-programaren baitan, Avner Dorman israeldar konpositore gazteak 2007an sortu eta Grubingerrek berak estreinatutako Frozen in Time perkusio eta orkestrarako kontzertua interpretatuko du. Programa hau osatuko duten kontzertuak izango dira urtarrilaren 13 eta 16an Donostiako Kursaalean, 14an Bilboko Euskaldunan, 17an Iruñeako Baluarten eta, azkenik, 18an Gasteizko Principal Antzokian.

Oporren bueltan, 2012ko urtarrilaren 9an itzuliko gara.

Gogorarazten dizuegu hurrengo abono-egitaraua honoko egunetan ospatuko dela: urtarrilaren 13 eta 16an Donostian, urtarrilaren 14an Bilbon, urtarrilaren 18an Gasteizen eta urtarrilaren 17an Iruñean. Urteko lehenengo Matineea urtarrilaren 14an izango da.

Egitaraua instrumentu-konbinaketa hain berezitik eratorritako hots eta egitura katalogo berrian murgilduko da. Honela, bi lehenbiziko partiturak jatorriz hari-laukote eta tubarako sortutakoak izango dira: Ballade for Tuba and String Quartet, konpositore eta tubaren birtuoso Roland Szentpalik 2002an idatzia, eta Quintet for Tuba and Strings, Jan Bach estatubatuarrak 1978an konposatua.

Itzala H.C. Andersenen arabera obraren erabateko estreinaldia. Hari eta tubaren arteko jokoak norabide berria hartuko du Euskadiko Orkestrako tuba bakarlari Oscar Abellak konposatutako hari-kuartetoren erabateko estreinaldiarekin. Partitura hau H.C. Andersenen "Itzala" kontakizun ilunetik sortzen da. Honetan gizon bat bere itzalarengandik aldentzen da, beranduago itzal hori gizaki bilakatuta itzuli eta gizona erahiltzen du. Egilearen arabera, argumentu honen aberastasunak eta narrazioan funtsezkoa den irudi batek ("itzalak gizonaren papera egiten zuen eta gizonak itzalarena") musika konplexu bat idatzera bultzatu zuten EOSeko musikaria, non "gai alderantzizkatuak" ugari diren eta hasiera batean akonpainamendua dena ondoren gai nagusi bihurtzen den

Eta kontzertua osotzeko, tubak beste ikupegi batetik helduko dio Matinéearen argumentu nagusiari: Pablo Sarasateren biolinerako Aires Bohemios obra ezagun eta klasikoa berraurkitzeko aukera izango dugu, tubarako moldatua. Kontzertu hau Oscar Abellaren irakasle izandako Mel Culbertsoni (1946-2011), tuba modernoaren aita izan zen interprete eta pedagogoari omenaldia izango da.

Schuberten 5. Meza interpretatzean Andrés Orozco-Estrada Andra Mari Abesbatzarekin arituko da berriz ere. 2007an zuzendu zuen estreinakoz, Musikasten, EOS ere lehenbiziko aldiz zuzendu zuen kontzertuan. Ondoren 2009an Musika Hamabostaldian eta 2010ean Orkestraren Abonu-Denboraldian zuzendu zuen Andrés Orozco-Estradak Andra Mari Abesbatza. Honetaz gain, lau abeslari gazte arituko dira, horietako hiru Euskadiko Orkestrarekin lehenbiziko aldiz: Ana Quintans sopranoa, Ida Aldrian mezzosopranoa, José Luis Sola tenorea eta Klemens Sander baritonoa.

Schuberten azken aurreko meza bere errepertoriora gehitzeaz gain, Orkestrak Camille Sain Saënsen 3. Sinfonia organuarekin interpretatuko du bosgarren programa honetan. Paristar konpositorearen sinfonien artean guztira bosgarrena eta azkena izan zen hau frantziar sinfoniak XIX. mendeko azken urteetan bizi izandako bilakaeran aurrerapausu erabakiorra izan zen. Honetan Saint Saënsek organua musika erlijiosoaren eremutik atera eta orkestrari gehitzen dio. Programa hau bera, Andrés Orozco-Estradak zuzenduta, baina Tonkünstler Wien orkestrak interpretatua, Vienako Musikverein-ean izango da entzungai abenduaren erdialdera.

Entsegu irekia. Musika Gelaren programazioaren baitan, azaroaren 24 ostegunean Orkestrak programa sinfoniko-koral honen entseguetako bateko ateak irekiko dizkie EHUko Esperientzia-Gelatako 63 ikasleri eta Musikeneko ikasle-talde bati.

UNICEF-ekin lankidetzan. Abonu-programa honen barnean Iruña, Gasteiz eta Bilbon izango diren kontzertuetan Euskadiko Orkestra UNICEF erakundearekin lankidetzan arituko da, haurren desnutrizioaren aurkako urte amaierako kanpaina berezi batean lagunduz. Orkestra erakunde honekin lankidetzan aritzen den bigarren urtea da.